Rev 7 | AOJFILIFITA | STEP | Amama mafeꞋma eaꞋ, aeꞋ ati ensel biamibiam maitu waꞋowaꞋola biefigin biefigin etap nafeꞋ netambela, mahapila uf hianai etapanai ma uf ina laꞋifina nehapusa etap o naoh embel luꞋwami o nefaꞋ anona lawag nendaꞋ felifal, owaꞋ.

Revelation of John 7

Esis Israel hiesi 144,000-peleis sefaꞋ ikwaf Godi

1 Amama mafeꞋma eaꞋ, aeꞋ ati ensel biamibiam maitu waꞋowaꞋola biefigin biefigin etap nafeꞋ netambela, mahapila uf hianai etapanai ma uf ina laꞋifina nehapusa etap o naoh embel luꞋwami o nefaꞋ anona lawag nendaꞋ felifal, owaꞋ. 2 EaꞋ ati anona ensel nafeꞋ nalata ilif aon natefima. Anan nahapila ikwaf laꞋifinai Godi nape namunai naꞋi nosahoꞋ epes sandaꞋ maol Godi. EaꞋ nofala ensel amama biamibiam God naseꞋama pepel ma mohambombaga etap naloma naoh. 3 Anan naꞋipam mehip naꞋi, “DeiꞋ ipeꞋ ina pehambombaga etap noloma naoh moloma lawah maim, owaꞋ. AtaꞋ owaꞋ. AfaꞋ waꞋi osahoꞋ epes isima sandaꞋ maol God apeꞋinai osaheꞋas uliꞋ. Nambimb andeandeꞋ pehambombaga amamaga amama.”

4 EaꞋ ameꞋ esis saꞋi esis amam nematawa isima maꞋumaꞋwis ensel anama nasaheꞋas. Esis nasaheꞋas eaꞋi sataga naꞋama 144,000. Esis amam nematawa hiesi wambotagw hiami epes Israeli. 5 DeiꞋ esis 12,000 epes hiesi esis wambota Judai saloma 12,000 epes hiesi wambota Rubeni saloma 12,000 epes hiesi wambota Gati. 6 EaꞋ esis 12,000 epes hiesi wambota Aseri saloma 12,000 epes hiesi wambota Naptali saloma 12,000 epes hiesi wambota Manasei. 7 EaꞋ 12,000 epes hiesi wambota Simeoni saloma 12,000 epes hiesi wambota Livai saloma 12,000 epes hiesi wambota Isakari. 8 EaꞋ 12,000 epes hiesi wambota Sebuluni saloma 12,000 epes hiesi wambota Josepi saloma 12,000 epes hiesi wambota Benjamini.

Esis amam nematawa hiesi wambota launai sandaꞋ lotu ma God

9 Amamaga amama hiꞋalam, aeꞋ ataꞋ atologon wapotiꞋ ati esis amam nematawa hiesi endilisi safiꞋi sondowaꞋanima sape. EaꞋ ina enin epen laꞋifina niamba epes isima sataga maꞋumaꞋwis, owaꞋ. Esis hias endililsi. Epes isima sape etap kantri hiagoma eaꞋ epes hiesi sape wambotagw hiami ma alop anama naninani, diga hianai naninani, isima hiesi hiꞋalas.

Esis saitu anama God natoma balata king ma naep sipsip noganai. Sala anom luwaguf afitimi laumi, sahapila bagah lagof asasimi. 10 EaꞋ soga saꞋi mehip naꞋama saꞋi,

“God apeꞋinai Anan natoma balata kingi naloma Sipsip noganai, amam biam mofaꞋapa motanimani ma makwaha waf aonai apeꞋ mandaꞋanai.”
11 Ensel amama hiami mandatama hiꞋalam maitu anama balata kingi eaꞋ agufumi amama 24-peleim maloma amamaga amama biamibiam mape namumi mape mitimaloꞋ mati etap felefeleꞋma balata kingi mandaꞋ lotu mandanifela God. 12 Amam maꞋiam naꞋama maꞋi,

“Endilisi! ApeꞋ mandanifel endilisi ma God apeꞋinai mafela agel ananinai luꞋuna! Anan Dembinai ofagonama howalagon. Anan nomonas hiami buꞋwami mapaina eaꞋ apeꞋ manifelona mafela agel ananinai! Anan pepel hiamunai endilisi! Pepel luꞋunai napoma Anan! Amama hiami ananimi atom laꞋelaꞋef. Endilisi!”

Nimanimi esis amam nematawa hiesi hiꞋalam deiꞋ

13 EaꞋ anona amam agufumi amama 24-peleim nahaliꞋi naꞋi, “Esis isima sala luwaguf afitimi, esis emi egafis? Esis safiꞋi enima?”

14 EaꞋ agwamana basef aꞋi, “Dembinai aeꞋinai, ineꞋ etina negawas.”

EaꞋ Anan naꞋipi naꞋi, “Epes isima fowaꞋ sape etap sofaꞋ nimanimi luꞋwami ma lagof esis naumbih. Esis sasaꞋopa luwaguf asasimi ma esimbel sipsip anama noganai, deiꞋ mataga afitim. 15 EaꞋ saitu balata king Godi natologoma. Owamb alip sandaꞋ opeh ananimi ipat ananinai. Anan nape balata anama kingi, anan atona anona nemaf nope nolomas niliꞋakwas. 16 Esis ina anona nemaf nolomohas wapotiꞋ, ina sogaꞋma embel iap noseꞋas wapotiꞋ, owaꞋ. Owaf ina anona nemaf laꞋifina nohas, eaꞋ ina anom nif luꞋwami mihihiꞋas sope, owaꞋ. 17 DeiꞋ main, sipsip noganai naitu felefeleꞋ endilisi ma balata kingi, anan nope numafias. Anan noꞋwas safeꞋma embel amama mataga anona ifata ma sofaꞋ embel amama ambal namunai napaimi. EaꞋ God anona nemaf nupatiꞋamasa embif hiami naep asasimi ma esis ina ataꞋ selef wapotiꞋ, owaꞋ.”